As dur op unne daag un paar Vlikkestaekers bî-j uch inne klas koome um te vraoge of dejje lid wiltj waere vanne jeugdraod van elluf of zelfs jeugdprîns of jeugdprinses wiltj waere, gaeftj uch dan drèk op want waat vae ut aafgeloupe vastelaovundjseizoen met de Jonge Vlikke hebbe mei-j gemaaktj es o n b e s c h r i e ë f e l i k. Vanaaf de oetrooping tot aan ut hieëring happe op asgoonsdig waas ut ein groeët fieëst. Iets waat vae noeëts mieër zulle vergaete! Vae wille dan auch hieël gaer un aantal minse bedânke dî-j dit vör os meugelik hebbe gemaaktj.
Bedânktj, bedânktj van Prîns Stan en Prinses Steffi
Op de ieërste plaats neteurlik de commissie vanne Jong Vlikke. Waat verzette dî-j un wêrk en waat zörge zeuj d’r vör det alles aeve vlekkeloos verluiptj. Vae hebbe d’r gewoeën gein (Doospelse) weurd vör. Ten twieëdje de jeugdraod van elluf en oos adjudante Lucas en Sophie. Nao groep acht gieët eederein ziene eige weeg, mer de bandj dae vae ut aafgeloupe seizoen hebbe opgebouwdj kos dao wöl us un stökske vör staeke. Waat waas ut geweldjig um met jullie deese vastelaovundj te hebbe mooge veere. En neteurlik prîns Martin d’n ieërste en prinses Marjan. Martin, gae woordj neet kepot te krieëge mer vae hebbe aardig pertî-j gebooje. D’r woore zelfs aovundje det vae nog langer doondje woore dan uch. De groeëte Vlikkestaekers en Vorst Eric. Vae zeen gruuëts det vae eur ieërste jeugdprînsepaar mochte zeen.
Oze Hoempa, de Henkies, ut optochtcomité, de deelnemers aan wichter- en groeëte optocht, menieër pestoeër, alle minse dî-j vastelaovundj hebbe geveerd, neumtj eederein mer op. En als leste oos aojers dî-j vanaaf ut begin veur os, neave os en achter os hebbe gestânge. Mochte vae eemus vergaete zeen dan bî-j deese allemaol bedânktj, bedânktj, bedânktj. In Wieërt zeen vae braaf mer op Doospel gieët ut daak d’r aaf.
Er zijn nog geen reacties geplaatst.